Áin hefur ekki farið varhluta af þurrkatíð sumarsins og hefur veiðin alveg verið í takt við það framan af.
Það er að lifna yfir henni þessa dagana en fyrstu sjóbirtingsgöngur hafa sjálfsagt beðið í startholunum niður á söndum eftir fyrstu alvöru rigningum á svæðinu og eru veður að skipast í lofti og vonir um fyrstu alvöru „skotin“ að aukast til muna þessa stundina.
Hér höfum við fréttir af tveimur hollum sem eru að glíma við gjörólíkar aðstæður á svæðinu.
Fyrst segjum við fréttir af holli sem Jón Gunnarsson var í forsvari fyrir, svokallaður „konutúr“ dagana 23.-25. ágúst.
„Við vorum bara mjög sátt við þetta, það var ekkert sérstakt vatn en við náðum samt að veiða 10 fiska, sex birtinga og fjóra laxa og allir fengu fisk sem var alveg meiriháttar“.
Fengust fjórir birtingana í Ármótunum og einn í Kleifarnefi, 1 lax fékkst í Ármótunum, 2 í Kleifarnefi og 1 í Höfðabólshyl.
Fiskarnir voru ca frá 3 kg upp í tæp 6 kg.
Stærsta fiskinn veiddi Guðrún Guðmundsdóttir í Ármótunum og var það „fullorðins“ sjóbirtingur, 88 cm hrygna. Vonandi fáum við mynd áður en langt um líður.
Það var fiskur víða um ána að sögn Jóns og eitthvað af fiski að ganga þó svo að það væri lítið vatn, því til staðfestingar þá reyndist einn birtingana með halalús.
Hollið sem tók svo við af Jóni fékk fyrstu alvöru rigningarnar á svæðinu og rauk vatnshæðamælirinn sem staðsettur er í Flatarhyl upp um tæpan meter á sex tímum til miðnættis í gærkveldi. Rennslið var 2 rúmmetrar á og jókst í 54 rúmmetra.
Við heyrðum aðeins í Sigursveini Bjarna Jónssyni í morgun en hann er einn þeirra sem eru í ánni núna.
„Pabbi fékk 9 punda lax í Ármótunum og ég fékk einn 3 punda lax í Kleifarnefi svo litaðist áin og var óveiðandi undir kvöld í gær. Ekkert varir núna og það var lítil úrkoma í nótt, áin aðeins skoluð en við erum ekki að finna fiskinn“.
Nú undir kvöld heyrðum við aftur í Sigursveini og hafa þeir félagar ekkert komist upp í gljúfur eða um miðbik árinnar vegna flaumsins og urðu ekkert varir við fisk fyrr en seinnipartinn þegar þeir félagar náðu einum birting í Kleifarnefi, tveimur í Ármótunum og einum neðan brúar.
Veðurspáin sýnir áframhaldandi vætu næstu daga en ekkert í líkingu við þá rigningu sem var á svæðinu á síðasta sólarhringinn þannig að horfur eru góðar fyrir komandi veiðimenn.
Meðfylgjandi myndir eru frá Jóni tekin við Hagafoss í blíðunni í fyrradag og svo eru hinar myndirnar skjáskot af línuritinu af vatnshæðamælirnum sem sýnir glöggt vatnsskastið og svo mynd frá Sigursveini í Ármótunum í dag en vatn var þá farið að síga töluvert frá því í gærkveldi.
Mælirinn |
Ármótin |
