Staðsetning

Fossálar eru í Skaftárhreppi í V-Skaftafellssýslu um 15 km austan við Kirkjubæjarklaustur. Fossálar falla til Skaftár austast á Síðunni. Fossálar er nokkuð vatnsmikil á sem á upptök sín sunnan undir Miklafelli á Austur-Síðuafrétti í um 550-600 m h. y. s.

Leiðarlýsing að húsi

Ekinn er þjóðvegur 1 sem leið liggur yfir brúna yfir Fossálana og tekinn fyrsti vegslóði til hægri af þjóðvegi 1 í gegnum merkt hlið. Þar er slóðanum fylgt, sem er vel merktur þar til að húsinu kemur.

Veiðihús

Gott veiðihús er við ána og er öll aðstaða þar til fyrirmyndar. Húsið er staðsett við hraunjaðarinn við syðri-Ál í ákaflega fallegu umhverfi, en náttúrufegurð svæðisins er einstök.
Húsið er rafvætt og í því eru tvö þriggja manna herbergi (kojur) setuaðstaða, sturta, eldhúskrókur með ísskáp, eldavél og kælikistu.
Gasgrill er á staðnum.
Veiðimenn leggja sjálfir til sængur, sængurfatnað, tuskur og viskustykki.
Veiðimenn mega koma í veiðihúsið einni klukkustund áður en veiði hefst og skulu rýma húsið klukkan 14 brottfarardag.
Veiðimönnum ber að þrífa húsið fyrir brottför og fjarlægja rusl.

Veiðitilhögun

Vorveiði
Fjöldi stanga: 3
Skipting daga: Tveggja daga holl (hálfur, heill og hálfur dagur)
Veiðitími: 3. apríl – 31. maí (vorveiðireglur sjá hér)
Agn: Fluga
Sleppiskylda á öllum fiski

Sumarveiði
Fjöldi stanga: 3
Skipting daga: Fjögurra daga holl (hálfur, heill, heill, heill og hálfur dagur)
Veiðitími: 20. júní – 7. ágúst
Agn: Fluga, spónn og maðkur
Kvóti: 2 fiskar á stöng pr dag
Eftir að kvóta er náð er bannað að veiða á maðk
Æskilegt að sleppa öllum fiski sem er 70 cm eða yfir.

Haustveiði
Fjöldi stanga: 3
Skipting daga: Tveggja daga holl (hálfur, heill og hálfur dagur)
Veiðitími: 7. ágúst – 18. október
Agn: Fluga, spónn og maðkur
Kvóti: 2 fiskar á stöng pr dag
Eftir að kvóta er náð er bannað að veiða á maðk.
Bannað er að veiða í Syðri-Ál eftir 10 okt
Æskilegt að sleppa öllum fiski sem er 70 cm eða yfir.

Daglegur veiðitími:

1. apríl til 31. maí frá kl 7-13 og 15-21
20. júní til 14. ágúst frá kl 7-13 og 16-22
14. ágúst til 18. okt frá kl 7-13 og 15-21

Seld eru leyfi til 18. október þar sem leyfi fékkst fyrir framlengingu, (10. okt.-18. okt.), síðasta ár, ef einhverra hluta vegna framlenging verði ekki heimiluð verða þau veiðileyfi sem seld eru þann tíma endurgreidd. Einnig er rétt að vekja athygli á því að einnig gæti orðið um veiðitakmarkanir á einhvern hátt að ræða í framlengingu t.d. eingöngu veitt á flugu og jafnvel sleppiskyldu á veiddum fiski.

Veiðisvæðið

Veiðisvæðið nær frá landamærum gegnt Orrustuhól, rétt ofan gömlu þjóðvegarbrúarinnar og til merkja á Brunasandi þar sem veiðisvæði Vatnamóta tekur við. Syðri-Áll er einnig með þessu svæði og eru upptök hans við hraunbrúnina, hjá veiðihúsinu og sameinast Fossálum á Brunasandi. Rétt er að veita því svæði nokkra athygli því þar er oft ágæt veiði þó svo það láti lítið yfir sér. Veiðin er bleikja fyrri hluta sumars, sjóbirtingur er líða tekur á haustið. Hægt er að aka um neðri veiðistaði árinnar.

Ódýr gisting og veiðileyfi
Leigt er út húsið fjóra daga í senn yfir sumartímann sem stendur frá 20.júní til 7. ágúst ásamt þremur stöngum.
Hvert holl kostar 32.400 krónur.