Sælir veiðimenn og konur.
Varla hefur það farið framhjá neinum að komnar eru upp deilur um veiðirétt Reykjadalsár á milli veiðiréttareigenda og Stangveiðifélags Keflavíkur. Hefur félagið verið við ána í áratugi og endurnýjað þar hvern samninginn eftir annan. Nú ber svo við að samningur sá sem undirritaður var af meirihluta forsvarsmanna Veiðifélags Reykjadalsár og Stangveiðifélags Keflavíkur er hafður að engu og veiðiréttareigendur farnir að selja sjálfir í ána.
Ber að taka fram að eftir þessum samningi er búið að vinna í eitt ár og átti annað ár af samningi að hefjast núna. Samningur þessi var undirritaður í apríl 2018 og var til fimm ára eða 2018 til og með 2022. Höfðu þá fjölmörg samtöl og fundir á milli aðila um samninginn staðið yfir í nokkra mánuði. Að lokum var undirritaður samningur með undirskriftum stjórnarmanna stangveiðifélagsins og meirihluta stjórnar veiðifélagsins, þar sem að sögn, einn stjórnarmanna veiðifélagsins mætti aldrei á boðaða fundi. Aldrei var tekið fram að neinir fyrirvarar væru varðandi gerð samningsins og ekki neinir slíkir heldur settir í samninginn sjálfann. Þáverandi formaður sagði að stjórnin hefði fullt umboð aðalfundar 2017 til þess að ganga til áframhaldandi samninga við stangveiðifélagið og styður fundargerð frá þeim aðalfundi það. Var þar af leiðandi skrifað undir samning og byrjað að vinna eftir honum.
Skipt var um formann veiðifélagsins á aðalfundi 2018, sem í raun voru tveir það vorið vegna þess að rangt var boðað til fyrri aðalfundarins. Í framhaldi af því varð vart við óánægju hjá einhverjum félagsmönnum veiðifélagsins með samninginn við stangveiðifélagið. Fóru fram nokkur símtöl fram á milli formanna félaganna þar sem komu fram óskir um styttingu á samningi frá veiðifélaginu og boð um hækkun á leiguverði samnings frá hendi stangveiðifélagsins. Var þetta gert frá hendi stangveiðifélagsins til þess að allir gætu gengið ánægðir frá borði, þó svo að samningur lægi fyrir.
Skemmst er frá því að segja að þetta boð stangveiðifélagsins fór aldrei til félagsmanna veiðifélagsins. Það næsta sem kom fram var að félagsmaður veiðifélagsins sendi kæru til Fiskistofu varðandi framkvæmd og boðun aðalfunda veiðifélagsins þá um vorið, var þetta um mitt ár 2018. Úrskurður Fiskistofu lá síðan ekki fyrir fyrr en í janúar 2019 þegar veiðileyfasala stangveiðifélagsins fyrir árið 2019 er gengin yfir. Var hann á þá leið í stuttu máli að ógilda bæri samninginn sem gerður hafi verið. Voru forsendurnar að baki þessari ákvörðun, að ekki hafi verið rétt staðið að boðunum og formsgallar á þeim, fyrir aðalfundina 2018 hjá veiðifélaginu, en þar hafi átt að taka fyrir samninginn til afgreiðslu.
Á þetta getur stangveiðifélagið engann veginn fallist. Að okkar mati lá samningurinn undirritaður fyrir.
Í framhaldi voru auglýst veiðileyfi til sölu hjá veiðifélaginu og fór stangveiðifélagið fram á lögbann á sölu veiðifélagsins á veiðileyfanna. Var því hafnað hjá sýslumanni og verður því sala veiðileyfa í Reykjadalsá í ár ekki í höndum stangveiðifélagsins. Var búið að selja alla daga í ánni í sumar og er þetta afar bagalegt fyrir þá veiðimenn sem tryggt höfðu sér leyfi í Reykjadalsá í sumar hjá stangveiðifélaginu.
Nú hefur úrskurði Fiskistofu og formanni veiðifélagsins verið stefnt og verða þau mál tekin fyrir í haust ef allt fer eftir áætlun. Mun félagið leita allra leiða til að tryggja rétt félagsmanna eins og best verður kosið.
Eigum við í stjórn Stangveiðifélags Keflavíkur erfitt með að trúa því að handvömm tengd stjórnar eða aðalfundarmálum Veiðifélags Reykjadalsár, geti orðið til þess að undirskrifaður og gildur samningur, að okkar mati, sem starfað hefur verið eftir í eitt ár og búið að þiggja greiðslur fyrir, verði dæmdur ógildur í framhaldi.
Eftir farsælt samstarf í áratugi er það með ólíkindum að málum hafi verið komið í þennan farveg í stað þess að setjast niður og finna lausnir á vandamálunum, ef einhver voru. Stangveiðifélagið gerði allt rétt í þessu samningaferli. Þeir annmarkar eða vandamál sem komið hafa upp eftir undirritun samningsins, og stefna honum nú í hættu, eru ekki tilbúin hjá okkur, heldur hjá viðsemjendum okkar.
Meira verður ekki sagt um þetta af okkar hálfu að sinni. Biðjum við enn og aftur okkar dyggu félagsmenn og alla okkar viðskiptavini afsökunar á þessum leiðindum og óþægindum sem þetta hefur í för með sér.
Virðingarfyllst
Stjórn Stangveiðifélags Keflavíkur.